Астанадағы “Sun study” балаларды дамыту орталығына Асекең келіп кетті. Иә, иә, бұрынғы Ғылым және білім министрі, ҚР Парламент Мәжілісінлегі әлеуметтік-мәдени даму комитетінің төрағасы, депутат Асхат Аймағанбетов оқу орталығымызға арнайы ат басын бұрып, жаңа бастамамызға сәттілік тілеп, шынайы тілектестігін білдірді.
Әуелде біз Асекеңді оқу-орталығымыздың ашылу салтанатты шарасына шақырған едік. Ол кісі келе алмайтындығын айтып, алда міндетті түрде арнайылап құттықтап кіріп шығатындығын жеткізді. Жәй айта салып оны орындамайтын адамдар қаншама? Ал Асхат Қанатұлының өз уәдесіне берік екендігіне көз жетті. Келемін деді, келді. “Біз дайындалып үлгермейміз, 17-ші желтоқсанда өткізейік” десем, “Ешқандай дайындық керек емес. Жәй ғана кіріп, орталықты көріп шығамын” дейді. Келіспеске амал жоқ. Асекең министр кезінде ойда-жоқта мектептерге соғып, жасандылықсыз шынайы бет-бейнесін көруді ұнатады дейтін еді білетін кісілер. Сол рас тәрізді.
Біз де неміз бар, сонымызды ғана көрсеттік. Ешқандай артық әсерлеусіз. Бүгінде орталықта 50-ден астам бала оқиды. 7-8 ұстаз сабақ береді.
Шағын ғана оқу орталығымыздың жұмысымен танысып, игі бастамаға сәттілік тілеу үшін арнайылап уақыт бөліп келген Аскеңе шексіз ризашылық. Мұның өзі ол кісінің қандай қарапайымдылығын, азаматтығын, еліміздің білім саласына деген жанашырлығын көрсеткендей.
Кішкентай балапандар да, ұстаздар қауымы да, ата-аналар да мәз-мейрам болып, ерекше қуанып қалды. Әрбір рухани іс-шара ата-аналарды да, бүлдіршіндерді өсіреді, дамытады ғой.
Осы жолы Асхат Қанатұлы ата-аналармен шағын кездесу өткізді. Бала тәрбиесінде ата-ананың орны туралы сөз қозғады. Балаларды кітап оқуға тәрбиелеу бойынша өз тәжірибесімен бөлісті. Ата-аналар да сұрақтар қойып, тұщымды жауап алды.
Балаларға сәби кезінде ертегі айтудың ең негізгі бір пайдасы — ол кейін әріп танығаннан бастап өздігінен кітап оқуға бейім болады екен. Рас сөз. Және Асекең ChatGPT-ді, яғни жасанды интеллектіні қалай ертегі жазуға пайдалануға болатындығын да түсіндіріп өтті. Бала тәрбиесінде заманауи мүмкіндіктерді неге пайдаланбасқа?!
Асхат мырза министр болған тұсында “Әліппені” қайтару, Мұғалім мәртебесі, олардың жалақысының өсуі, артық жұмыстарға жегілмеуі және тағы басқа мәселелерді шешіп кетті. Бұл іргелі жұмыстарға тарих өз бағасын береді деп ойлаймын.
